【A&M Diary】「熱辣辣嘅點心到喇！」店員細心將點心上枱，點心即叫即蒸，每一籠都出晒煙，睇見都覺得好吸引啊！呢間位於旺角嘅點心到MIX·大排檔主打港式料理，每日16:30前供應點心，去到夜晚就變成極具鑊氣嘅大排檔小炒，各具特色，今次就先嘆點心，下次再嚟試埋小炒啦！
晶螢鮮蝦餃
點心到MIX·大排檔嘅點心選擇好多，但講到食點心，當然唔少得蝦餃。蝦餃皮薄剔透，蝦肉非常多，夠晒彈牙！
原隻蝦燒賣
嘩！隻蝦勁大隻，呢籠燒賣勁彈牙，夠晒驚喜呀！燒賣上面舖滿蟹籽，加上蝦同豬肉嘅比例啱啱好，好好味！
黑松露菜苗餃
黑松露獨特又濃郁嘅香味、菜苗則清新又甘甜，加上彈牙嘅鮮蝦，口感豐富，而味道又充滿層次。
薑葱牛柏葉
牛柏葉爽口彈牙，又蒸得夠腍，索晒薑葱香味。
蜜汁叉燒包
叉燒份量多，一啖咬落去，充滿幸福感。
