今個星期五 (30日) 係樂隊Beyond主音黃家駒逝世30年，TVB日前播出特備節目紀念家駒，其中請來肥媽分享與Beyond過去點滴，提到家駒胞弟黃家強多年前有日打電話搵佢，話家駒生前原來作咗一首歌畀肥媽。家強今日 (26日) 罕有喺社交媒體出post，大鬧有人講大話。
家強喺Facebook帖文炮轟，表示「關於我的都是謊言，我哥哥雖然走了，我還活生生的，怎麼可以這樣不尊重人，無論是什麼途徑得到這首歌，誠實說出原因未必不能”感動”人。」家強嘅FB對上一次出Post已經係2020年8月，相隔3年再出post，相信今次肥媽嘅說話，令家強忍無可忍才發聲。
Photo / Facebook@黃家強
Photo / Facebook@黃家強
Photo / Facebook@肥媽 Maria cordero
今次事件緣自TVB為家駒逝世30年播出嘅節目，肥媽喺節目中話「係10幾20年前嘅事！有一日家強同我講，其實家駒寫咗首歌畀你架，肥媽！我話，真係好，有機會唱，如果有機會唱到就好！」肥媽口中呢首歌叫《感激這對手》，佢話錄音當日，唱頭兩段想著Beyond和家駒，更哽咽說：「其實我都有同家駒講，因為我真係冇時間聽呢首歌，我淨係前兩日聽過一次，我同家駒講『你幫幫我』，我聽兩次入去 (錄音) 就得，我覺得佢都有幫我。我諗唔到佢會寫呢隻歌畀我，呢個好觸動到我嘅心，真係我嘅榮幸。」
家強嘅Facebook post無否定家駒有作歌畀肥媽，但針對「關於我的都是謊言」，相信就係指肥媽話「有一日家強同我講，其實家駒寫咗首歌畀你架...」，家強又留言話「係呢個風雨飄搖嘅時代，我希望做人可以無愧於心。」 唔少網民留言支持家強，話「幾十年來都有人無恥地消費，證明你地當年真係好成功」、「唔該果隻XX收返自己不實之詞」。
肥媽日前抖音出過一段片，都係關於家駒生前作過一首歌畀佢，但同TVB節目上所講嘅版本有出入，肥媽同樣話當年家駒寫咗一首歌，不過搵佢唱嘅人唔係黃家強，而係BEYOND嘅經理人，唔知肥媽係咪一時搞亂講錯，暫時亦未知肥媽邊個版本先係真確。
