【A&M Diary】長洲深受遊客歡迎，一到週末或者長假期，長洲就會人頭湧湧。大部份嘅遊客都集中喺市內飲飲食食、去東灣游水曬太陽、或者租間渡假屋輕輕鬆鬆玩兩日一夜。但其實長洲都有唔少郊遊景點，今日我哋就嚟到輕鬆易行，鄰近張保仔洞嘅五行石。五行石位處懸崖邊，加上一望無際嘅海景，非常壯觀，絕對係一個打卡影相嘅熱點。
提提你
1. 由西園出發，經過白鰽灣，大概行20分鐘就會到達五行石，屬於初級路線
2. 另一條路線，就係由張保仔洞經鯆魚灣前往，但部份路段需要沿岩石裙邊，有一定危險性
3. 沿路冇任何洗手間或補給站，所以記住帶備足夠嘅飲用水前往
4. 大家記住保持環境清潔，自己垃圾自己帶走，絕對唔可以破壞大自然環境
我哋今次由西園出發，經過白鰽灣，一路都係水泥路，波幅唔大，只有少量嘅上斜同樓梯，輕鬆易行。
五行石
五行石其實係由五塊高達五米嘅大石組成，石與石間有路可行，輕易就影到尤如武俠小說嘅畫面啦！另外，五行石喺正懸崖嘅旁邊，感覺好似會搖搖欲墜跌落海咁，真係非常壯觀。
