【A&M Diary】下白泥沿岸都係香港少見嘅泥灘，呢度除咗出產流浮山生蠔之外，更有天空之鏡嘅美譽。除咗以上嘅賣點，大家認識下白泥大概都係因為呢度嘅日落！下白泥嘅日落係全港數一數二，所以有唔少人專登入嚟影相打卡，如果運氣好，仲可以睇到彩霞架！
前往方法
專線小巴：由元朗泰豐街坐33號小巴前往，但值得留意係小巴以村民優先上車
的士：由天水圍西鐵站搭的士前往
自駕遊：雖然方便，但唔太建議，因為泊位唔多，而且村路單線雙程，路況狹窄
提提你
1. 旁邊就係附近居民居住嘅地方，所以大家遊玩參觀嘅時候，記住保持寧靜
2. 大家記住保持環境清潔，自己垃圾自己帶走
3. 下白泥蚊蟲眾多，應做足防蚊措施
4. 自備拖鞋、水鞋及清潔用品
潮漲潮退
雖然嚟下白泥主要係睇日落，但如果就啱時間，如果睇到剛開始嘅潮漲，仲有機會透過淺水嘅倒影，見到天空之鏡。
泥灘
下白泥係一片泥灘，如果大家細心啲睇，可能會見到招潮蟹、彈塗魚等紅樹林生物。如果好運，仲有機會見到4.75億年前已經生存嘅馬蹄蟹添。
最美日落
下白泥除咗可以睇到天空之鏡，更可以睇到潮汐漲退，但最吸引嘅當然係日落美景！下白泥嘅日落更被稱為全港最靚嘅日落，日落瞬間嘅Magic Moment絕對係要set好腳架，亦要用心好好享受呢個奇妙時刻。
