【A&M Diary】好耐冇出街玩啦，今個周末去邊好呢？不如搭船去離島，親親大自然。我哋就點指兵兵，揀咗去南丫島榕樹灣。講到南丫島必食餐廳，大家一定會諗到南島書蟲，啱晒文青嘅你！
今日去到南島書蟲，發現餐廳唔同咗好多。同老闆娘傾開，先知原來啱啱裝修完。餐廳感覺比以前光猛咗好多，以海洋做主題，有好多海灘相關嘅裝飾同滑板，好relax呀。話明係書蟲咖啡室，當然有返個書櫃喺度啦！除咗裝修唔同之外，餐廳嘅食品亦都大有不同，以前只係得素菜提供，依家有埋肉類選擇，啱晒M佬呢個食肉獸！
鮮茄巴馬火腿火箭菜Pizza
Pizza新鮮焗起，上面鋪滿咗好多新鮮嘅火箭菜，最驚喜嘅係有好多番茄醬同新鮮蕃茄，一咬落去啲番茄醬多到流晒出嚟！
蜜糖烤豬肋骨配薯條
豬肋骨烤得好香，仲有少少嘅蜜糖香味，好惹味！薯條都係新鮮炸起，點埋茄汁，好滿足！
