【A&M Diary】嚟到年尾，除咗樂壇嘅頒獎典禮之外，如果比你揀一間我最喜愛嘅米線，唔知邊間又係你嘅心水呢？相信頭三名嘅心水都離不開香港米線集中地嘅荃灣，其中荃灣雲家小鍋米線更加係荃灣米線排行榜嘅常客，濃郁嘅湯底絕對係佢哋嘅致勝之道。
涼拌墨魚頭
食米線又點少得叫啲小食呢？荃灣雲家小鍋米線嘅小食份量十足，啱晒齊齊share。涼拌墨魚頭新鮮又夠彈牙，加上蒜頭嘅調味，帶出墨魚嘅鮮甜味。
蒜泥白肉
究竟係食蒜泥定食白肉，我已經分唔清楚！因為勁多、勁多、勁多蒜泥粒粒舖滿成隻碟，蒜香味極濃，非常惹味；至於白肉肥瘦分明，油香十足，清迷蒜香味嘅朋友絕不能錯過！
秘製豬頸肉
秘製豬頸肉即叫即整，所以上枱夠晒新鮮熱辣！豬頸肉燒到非常香脆，仲帶有焦香味，至於肉質彈牙，仲保持肉汁，加上泰式甜辣醬，非常開胃。
豬大腸、豬脷，腩肉小鍋米線
荃灣雲家小鍋米線嘅湯底味道就係決勝負嘅關鍵！我哋叫咗酸辣湯底，小辣嘅辣味都已經非常惹味，辣而不油。至於湯底相當濃厚，雖然比同區其他對手偏酸，但相對越食越開胃。配料方面就揀咗豬脷、豬大腸同腩肉：豬大腸入味得嚟頗為肥美；而豬脷厚薄適中，入味又夠軟腍；豬腩肉嘅大小啱啱好，一層肥一層瘦，肉味香濃，而且唔會嚡口。
