【A&M Diary】如果話連接香港島同九龍，穿梭維多利亞港嘅天星小輪係人生50個必到景點；咁連接香港仔同鴨脷洲，穿梭香港仔避風塘嘅舢舨街渡就應該係香港必到嘅深度景點喇！呢條航線係市區內最後一條舢舨街渡航線，除咗吸引遊客之外，亦便利往返兩地嘅居民添！
上船落船位置
鴨脷洲：位於悅海華庭對出嘅碼頭
香港仔：設有兩個上船及落船位置，分別位於香港仔海濱公眾登岸梯級、香港仔魚類批發市場街渡碼頭
航程大約4分鐘，喺鴨脷洲上船嘅時候，因為香港仔分為兩個目的地，所以要小心唔好上錯船呀！
舢舨街渡
呢條航線喺1950年代開辦，直至1980年鴨脷洲大橋通車，至90年代多條巴士路線陸續開啟，令舢舨街渡嘅客量大減，甚至傳出停航嘅消息。但南港島線開通之後，舢舨街渡反而吸引香港仔市民坐舢舨街渡至利東站坐港鐵出市區。
香港仔避風塘
短短4分鐘嘅航程，穿梭繁忙嘅香港仔避風塘。如果坐朝頭早嘅航班，更加睇到剛捕魚回港嘅漁船添。喺避風塘內當然唔少得一架又一架嘅海上行宮，呢啲遊艇好靚呀！喺避風塘除咗漁船同遊艇，不妨留意一吓，仲有唔少候鳥喺避風塘內覓食同飛翔架！
