【A&M Diary】英國出名多博物館，歷史、科學、交通、軍事、航海等，應有盡有，所以去英國旅行，博物館絕對係一個唔可以錯過嘅行程。嚟到英國南部嘅港口城市 —— 修咸頓，身為航空軍事迷就絕對不能錯過Solent Sky Museum。
修咸頓 Southampton
由倫敦Waterloo坐火車去修咸頓，最快只需要1小時15分鐘，而且修咸頓有唔少景點，適合大家由倫敦出發，作為倫敦近郊一日遊嘅選擇。
Solent Sky
喺1910年至1960年期間，發生過兩次世界大戰，而喺呢段時間，航空發展一日千里，而索倫特地區（Solent）就成為英國，甚至世界嘅航空研發中心。喺最高峰嘅時期，有超過26間飛機製造商以呢個地區作為基地。
Short Sandringham S.25/V – VH-BRC, Beachcomber
Solent Sky Museum嘅面積唔大，但展出超過20架退役飛機。當中深受航空迷喜愛嘅就當然就係Short Sandringham S.25/V – VH-BRC, Beachcomber，呢架1943年啟用嘅水上飛機保存得非常好，大家仲可以登上飛機，喺兩層嘅客艙影相打卡。航空公司為咗增加乘客量，大部份嘅座椅都係面對面，空間非常狹窄，好彩水上飛機嘅飛行時間都唔會好耐。另外，航機上亦張貼飛行安全展示卡，真係充滿歷史嘅味道。大家仲可以睇到機上嘅galley、洗手間同行李艙部份，絕對值回票價。
英國海外航空公司
喺Solent Sky Museum除咗退役飛機，仲有唔少屬於英國海外航空嘅展品。英國海外航空係現時英國航空嘅前身，當時嘅航線圖、飛行時間表、廣告等珍貴資料，勁完整咁保存落嚟，原來當年由倫敦飛去香港，要飛7日先到，肯定真係坐到pat pat都痛呀！
