【Viu】周秀娜、MC張天賦噚晚孖住出活動，期間MC獻唱咗兩首歌，娜姐即刻變「賦二代」拎住部電話拍片，聽到勁陶醉！事後佢直言想撲MC嘅處男紅館騷飛添！提起佢早前去馬來西亞著名景點椰殼洞為電影《爆裂點》取景拍煞科戲，點知突然一場暴雨致水口位秒速高漲，由腳眼位升至腰間，最終全team劇組被困洞內3個鐘！娜姐亦有憶述意外發生經過，有感與死亡好接近，若然冇拉住當地工作人員綁實嘅急救繩，成個人肯定被沖走，又咁橋場戲係講生離死別，令佢更覺得世事無常！
而籌備緊紅館騷嘅MC搞笑自爆操弗要求降低咗，只要唔肥住上台就得，所以騷肌都要視乎身體狀況。講到演唱會未開賣就已經見黃牛黨，MC聽到勁識做話會爭取加場、網上直播、甚至開part 2，又呼籲「賦二代」唔好買黃牛。提起娜姐爆係「賦二代」之一，問到MC有冇調番轉睇對方嘅作品、寫真？MC搞笑答一定有，行街都會見到娜姐嘅廣告。至於有傳MC為儲歌開騷而推兩部電影，佢指唔太清楚，話可能公司知佢要排練，所以檔期未必遷就到。
