【A&M Diary】今朝M佬whatsapp我，叫我lunch唔好食咁飽，佢話今晚晚餐超豐富，要我留肚慢慢嘆，心諗有無咁誇張呀！結果我只係食咗隻蘋果當lunch，未夠3點已經好肚餓，但我嘅理智話我知，我要堅持，因為今晚去嘅係佐敦倫哥尊尚火鍋私房菜，任食雞煲，仲有打邊爐、剌身、炆花膠鮑魚……
刺身
先上枱嘅就係刺身拼盤，二人份量有赤蝦、北寄貝、三文魚、八爪魚同帶子，我哋就最鍾意赤蝦，好大隻，夠厚身，個蝦頭仲要勁多膏！
胡麻豆腐
頭盤就係胡麻豆腐，加咗胡麻醬嘅豆腐，特別香滑！
花膠鮑魚
等緊雞煲嘅時候，先上花膠鮑魚！呢個十級好味，花膠同鮑魚都好入味！
雞煲
可以揀唔同辣度，我哋就揀咗中辣，不過，鍾意食辣嘅我哋，覺得中辣都唔夠剌激，下次要試大辣先得。店員會提示，雞煲一滾起，每兩分鐘攪拌一次同減一個熱度，以防黐底，重覆四次，中途加入埋豬皮同魷魚，8分鍾後就會熟晒喇。雞嘅份量超多，望上去感覺有成隻雞，雞肉嫩滑入味，而最最最好味係豬皮，完完全全索晒啲辣汁，好惹味。
食完雞煲之後，再揀湯底打邊爐。而我哋繼續揀麻辣湯底，一於由頭辣到尾。店員會先送上唔同嘅食材，唔夠嘅可以喺任食紙選擇再encore。
海鮮拼盤
拼盤有蝦、蟶子、蜆、厚切龍躉片同蟹等等，大部份海鮮都已經包含喺任食紙，可以無限encore，最推介係龍躉片，好彈牙，夠晒新鮮！
牛頸脊肉
雪花紋理清晰，牛肉味特別濃，碌20秒左右就食得。
蝦滑、墨魚滑
好彈牙，我哋encore咗3次！好足料，超多墨魚粒同蝦粒。
仲有雲吞、韭菜餃、蔬菜籃、響鈴同炸魚皮，食晒都已經9成飽，都唔駛點encore，下次再嚟要連早餐都要唔食留肚先得。
