【A&M Diary】通達食店有兩間分店，本身去到旺角分店，但竟然摸門釘，唯有轉移陣地去到油麻地嘅通達食店啦！不過，油麻地分店除咗無炸魚餅之外，呢度嘅油渣麵絕對係比旺角分店差少少，但今日真係好想食油渣麵，所以照殺啦！
咖喱魚蛋
油麻地通達食店嘅油渣麵雖然麻麻，但呢度嘅咖喱魚蛋一向都好出色，每次嚟到油麻地地鐵站，都會心思思想督返串通達嘅咖喱魚蛋。不過，以前嘅辣汁好似濃啲惹味啲，辣到要去對面買杯珍珠奶茶飲；但今日感覺完全唔入味，非常失望。
油渣麵
唔知由幾時開始，通達食店變成炸豬油渣。雖然大部份人都鍾意食炸過嘅豬油渣，貪佢口感脆卜卜，但我就係鍾意以前Q彈嘅版本。但講到底，呢碗油渣麵最吸引我嘅反而係佢嘅辣菜甫，好惹味㗎！其他配料仲有火腿同冬菇絲，至於麵底就係上海粗麵，但我始終覺得旺角分店係好食啲！
