【A&M Diary】A姐話因為疫情無得去旅行，生活開始乏味，所以我今日就負責plan行程，令佢今個weekend都過得有旅行feel啦！除咗玩Staycation，其實去下郊遊都好舒服。但又怕離島多人，所以今日約埋屋企人嚟到粉嶺雲泉仙館，除咗有齋菜食，仲可以行下館內嘅池園，平靜一下平時煩燥嘅心情。今個weekend就同屋企人去輕遊一下雲泉仙館啦！
嚟雲泉仙館嘅除咗可以搭巴士或小巴，亦都可以揸車前往。呢度嘅車位唔多，但勝在免費，記住先到先得㗎！我哋選擇咗農曆十五去，人流好多，等泊車真係要多少少耐性。
七彩素拼盤
食齋菜又點少得酸齋、咖哩齋同素叉燒呢？拼盤份量好多，我就最鍾意咖哩齋，雖然齋菜普遍偏淡味，但呢個咖哩齋嘅咖哩香味十足，又夠入味。
如意菰時菜
如意菰嘅菰味香濃，加上用素蠔油去炆，好好味，而且口感煙韌，唔知以為食緊鮑魚呀！時菜係菜心，聽講係新界種植，所以特別鮮甜爽口。
五柳素石斑
五柳素石斑基本上係每次食齋嘅必點項目（除咗一向唔食芋頭嘅A姐）。炸漿夠薄，而芋頭蓉好creamy，外脆內軟，酸甜汁更加令到素石斑更開胃！
春卷拼西檸鴨
西檸汁為呢個西檸鴨加晒分，好惹味，而且素鴨先輕輕煎過，所以做到好似鴨皮咁！春卷就好脆口，入面係爆多餡，好有口感。
豉椒炒田螺
呢個豉椒炒田螺絕對係驚喜之作！用蒟蒻做到田螺嘅神粹，無論外型，顏色都好似，爽口彈牙，配埋豆豉去炒，非常惹味！
碧綠排骨
排骨？計我話，就更似龍蝦丸。荷蘭豆飽滿，味道偏淡，老人家就啱晒。
美果扒雙菰
草菇同磨菇都炒得好香，雖然就無咩驚喜，但配飯就一流喇。
椒鹽花枝片
A姐話佢細細個嚟，呢個椒鹽花枝片係必食項目，但今日嚟到，炸得唔夠香脆，又唔夠熱，椒鹽又落得好少，有啲失望。
喺雲泉仙館嘅白粥同白飯係自助任食，而白粥用腐竹同白果煲成，清香十足，所以我不知不覺食咗6碗。
食飽飽就喺雲泉仙館內四圍行吓！雲泉仙館建於1986年，供奉道教純陽師祖呂洞賓嘅道觀。事不宜遲，即刻入去睇睇，行吓啦！
「福祿壽」 像
雲泉仙館以仿古中式宮殿建築群為主體，大門口就題咗「雲泉仙館」四個大字。後面就有福祿壽三星（左至右：壽星、福星、祿星），好多人都同佢哋合照，攞番個好意頭。
中式庭園
經過餐廳後，就係中式庭園，因應唔同季節會有唔同嘅花做主題，影相都幾靚㗎！
涼亭白橋荷花池
今日嚟到，啲荷花開得好靚呀！好多攝影發燒友都set好晒腳架影相，而荷花池正中央嘅白橋同涼亭，更加係雲泉仙館嘅必影景點，連TVB古裝嘅御花園都成日喺呢度取景。
