【裝修佬】曱甴分兩種，一種係街頭大曱甴，生活喺惡劣環境（大強），一種係細細隻的家居曱甴（小強）。大強有時飛入黎，好難避，唔緊要，因為易處理，見一隻殺一隻便可，因為除非你或屋企環境非常污穢潮濕，否則佢都唔會在家中產卵（當然，如果鄰居或走廊環境好惡劣，就真係要考慮裝蚊網或關窗）；至於小強，就未必同家居衛生有關啦。比如：如果你鍾意網購，你知倉庫好多曱甴架啦，好容易帶埋啲卵番黎都唔知。所以，盡量唔好在家拆貨；同埋從街市拿回來的袋呀紙皮呀，如果想保留，都應放入密實膠箱，一粒細細地的蟲卵，入面已有幾十隻小強。同大強唔同，呢啲係家居曱甴黎。佢地會產卵，落地生根，長殺長有。
要對治家居曱甴小強，有三個方式：
1.倉庫紙皮多，蟲卵易入屋
嗱，小強的移動範圍係兩三米，所以好大機會唔關鄰居事，好大程度反而係你自己喺街外帶入黎而唔自覺。正如頭先所講，網購、街市買野，都係高風險因素，要小心注意。萬一有小強持續出現，殺佢無用，驅趕更無用，你需要用那種一傳十、十傳百的藥餌去解決佢個巢穴。
2.認識曱甴屎，見卵更要知
曱甴嘅聚腳點係有跡可尋，但好多人未必識得認。曱甴屎係一粒粒黑色嘅點點，而曱甴卵就係好似紅豆或綠豆嘅物體。如果你見到，當然就要喺呢啲重點位置放藥餌啦！記得放左藥餌之後，見到有曱甴要忍忍手，唔好打死佢，由得佢帶埋啲藥俾佢班frien啲食，咁先達到你嘅目的。
3.殺蟲藥要啱，工具都要啱
如果自己搞唔掂，就要找滅蟲公司啦。呢千零蚊，其實係好抵畀。因為佢地有三個強處：第一、啲藥同市面唔同，唔怕撞（如果你之前施藥不當，小小強已建立咗抗藥性，你再放藥都係浪費金錢）；
第二、佢地會放幾百個「點」，你最多咪買十盒八盒藥？但滅蟲公司會地毯式咁喺有小強蹤跡的位置點幾百個點，將佢地一網打盡；
第三、安全呀。唔好以為滅蟲公司啲藥強啲危險啲。其實滅蟲公司嘅藥，比你在街買的更加安全，因為佢哋受監管，亦有相關知識，街上賣的反而未必有王管。
當然，選擇滅蟲公司都要小心。第一，要搵啲有保養服務嘅，你知啦，再搵人執手尾就至少double計！第二，要搵啲有專業知識嘅，會同戶主分析問題成因，因為蟲害通常都同用家生活習慣或者環境有關；如果做完就走，做得幾好都無用啦。一年半載後藥力過左，問題又再出現，又係double計㗎喇。
