【now.com生活】曾因為「try my best」發音畀人質疑英語水平嘅立法會議員陳克勤，今次又因為一句英文出亂子，39個建制派議員日前聯署咗封信畀教育局局長楊潤雄，要求教育局跟進大學校園內嘅標語。不過，喺聯署名單上嘅謝偉俊，原來根本就不參與聯署，因陳克勤誤解咗佢個句「I’ll pass」，搞到佢「被聯署」。
謝偉俊接受電台訪問，就「話到明唔玩架喎，點解會放咗我落去？」，「以為是最簡單的表達方式」，仲話「有玩過啤牌都知（I'll pass點解），咁可能克勤無玩過啤牌呢！
其實pass呢個字有好多意思，根據Cambridge Dictionary，可以解「通過」一個法案、「傳遞」一樣事物，又可以解「經過」，比如 「If you pass a book store, could you buy Gary a dictionary?（如果你路過書局，可唔可以買本字典畀克勤呀？）」
玩過啤牌嘅人都知，當無牌出嘅時候，就會嗌「pass」，意思即係你放棄今round出牌嘅機會，所以pass亦有「放棄」嘅意思。今次事件中「I’ll pass」呢句，可以用嚟拒絕你唔想去或者唔想講嘅嘢。如果有人offer你一啲嘢，而你又唔要嘅話，你就可以講「I’ll pass」。
例如：
Would you like to have dinner with Gary tonight?
你今晚想唔想同克勤食飯呀？
No thanks. I’ll pass.
唔使客氣啦，我唔去啦。
當然，pass又點只咁少意思，加埋其他字，組成phrasal verb，仲可以有唔同變化，好似如果加away，就係解「過身」，今次真係畀Gary笑到幾乎pass away喇。
