【now.com生活】現實，就係殘酷。
公司生意唔好，炒嘅係打工仔；
上司做錯事搞到公司蝕錢，孭鑊嘅係下屬；
公司老闆賺大錢，打工仔賺嘅只係一個月多少少嘅花紅。
我於沙士嘅時候投入職場，見證住大型企業嘅管理手法有幾咁醜陋。公司生意唔好，賺少咗就已經要大幅裁員、凍薪、又或者係單方面將僱員合約更改，減少同事上班日數縮減開支，一啲都冇諗過社會責任。對大公司來講，員工就只係一顆螺絲，連齒輪嘅地位都唔到。
沙士期間經濟差，大企業話炒人係迫於無奈嘅做法，到開放自由行經濟轉好，大企業開始請人，但係起薪點就不停下降，公司越賺越多，員工嘅得益就係5%升幅同埋一個月嘅花紅。
公平咩？
上一代既得利益者兼老屎忽成日話新一代嘅人唔勤力、唔上進，只係識怨天怨地不思進取，但事實係?家嘅香港要向上流比以前艱難何止十倍。好多人仲以為將自己嫁俾公司，日日朝七晚十一係勤力上進嘅表現，將自己嘅健康同時間賣畀公司，換來嘅就係經濟差嘅時候裁員，經濟好但上司做錯事又裁減下屬節省開支。
悲劇。
我太太以前喺一間貿易公司工作，因為懷孕而獲得前四後六嘅法定產假，女兒最後比預產期遲咗差唔多一星期出世，身體復原時間唔夠就打算同上司講想攞多幾日大假休息。
點知個女上司就話我太太冇責任心，問我太太生小朋友係咪大晒，佢話自己年輕嘅時候生完小朋友兩個星期就上班，話?家啲人只係識顧住自己，唔諗自己放假而令到公司同事分擔埋太太嘅工作。
我同太太講笑話：「工作重緊要過自己嘅兒女，抵你阿姐做經理，而你就做助理。」
新一代嘅打工仔要改變思維，工作好重要，但家人同愛人同樣重要，唔好俾工作佔據自己嘅人生，要活在當下，選擇Work Life Balance。記住，公司冇咗你冇所謂，但對於家人來講，係唯獨你是不可取替。
職場上面，對住公司上司唔使講情義，講嘅只有港幣。
文：庸材
（八十後物業經理，網絡小說作家，喜歡平庸，更喜歡當塵世間迷途小書僮）
FB： https://www.facebook.com/yungchoi2012
〈不是庸材〉每隔周四刊登
專欄屬作者個人意見，不代表本網立場。
