【now.com生活】「叫我經理!」
曾經做過一份工,個經理第一次見面就叫我叫佢做經理,作為一個年青人,我當然諗都冇諗就叫佢聲「陳經理」。
細個剛出來社會工作,因為見識少,我會以為經理個個都好勁,有事唔明問佢哋嘢,佢哋會咩都識;自己做錯嘢連累公司蝕錢,經理會攬住啲細,唔會畀公司炒人;又或者經理就好似職場上嘅再生父母咁,佢哋會扶持自己,教自己點樣成為一個成功嘅人,一步一步咁往上爬。
點知,原來所謂嘅經理,只係一個縮骨卸膊,冇料扮四條,揸住雞毛當令箭嘅卑鄙小人。
有事唔明問佢,佢叫你自己諗掂;
有事想佢幫手,佢叫你唔好煩佢;
做錯事要揹鑊,佢會第一時間隊你出去;
想請大假溫書考試,佢會問長問短,然後唔批假畀你。
經理?
好多人唔明白,以為經理身處公司嘅管理層,理應有權有勢,可以肆意咁呼喝下屬、欺壓或者係玩弄下屬,但又冇諗過,一間公司裡面,不論係管理層或者係前線同事都好,大家只係打工仔,喺公司入面只係一粒微塵,隨時被人代替,既然係咁,又何必揸住雞毛當令箭做人。
好多昏君,以為下屬叫自己經理就代表被人尊重,但實情要下屬尊重上司,首先上司一定要大公無私,賞罰分明,第二就係識得解決問題,而唔係解決同事,跟住就係識得易地而處,體諒同事嘅苦處,而唔係開口埋口要求下屬叫自己經理就代表尊重。
以後有人要求我叫佢做經理,我會照講,但我怕自己會不其然咁喺度偷笑。
笑,唔係笑佢叫自己做經理,而係笑佢以為我真心叫佢做經理。
呢類咁嘅人,傻仔一名,唔多駛理。
文:庸材
(八十後物業經理,網絡小說作家,喜歡平庸,更喜歡當塵世間迷途小書僮)
FB: https://www.facebook.com/yungchoi2012
〈不是庸材〉每隔周四刊登
專欄屬作者個人意見,不代表本網立場。