【now.com生活】有日,一位先生嚟到診所,行埋嚟登記處問我:「姑娘?」
我:「係~有咩幫到你?」
佢:「我想要便秘呀,你有冇藥可以便秘?」
我以為我聽錯:「先生,你係想睇便秘嗎?可以呀~我同你登記先呀,麻煩你身分證呀。」
佢:「我唔係有便秘呀,我係想便秘呀!」
⋯⋯你唔係嚟求醫,你係嚟求死的是嗎?
我:「吓?想便秘?你肚屙呀?係咪想要止屙藥啊?」
佢用溫柔的眼神溫柔的語氣望住我講:「你唔好咁蠢啦好冇?」
⋯⋯醫生,我想嘔呀。
佢繼續講:「我冇話我有肚屙,我好正常嘅。」
我:「咁⋯⋯乜嘢想便秘。我哋得止屙藥或者通便藥⋯⋯」
佢再好溫柔咁講:「即係我想幾日先去一次廁所。你唔好咁蠢啦~」
大家忙多麼漂亮理由,你屙屎都冇時間去呀?
我:「點解要幾日先去一次,咁係唔健康嘅⋯⋯」
佢:「因為啲糞便硬晒好有感覺,我幾鍾意咁,排出嘅時候要好用力,我先覺得有感覺。」
人嚟!拖佢出去打到佢硬,唔好打死佢,打硬佢就得㗎啦!
我:「如果你有需要同醫生傾吓了解吓,我一係幫你登記先呀。」
佢冇出聲,企咗喺度。
大家姐揮手叫我行入去,問我:「咩事呀?」
我:「佢話想便秘喎,想幾日先屙一次,想啲屎好硬,好有感覺喎。」
大家姐行出去望住先生,先生又望住佢。
大家姐問:「你好想硬呀?」
先生吞吞口水:「⋯⋯都係⋯⋯冇事啦。」
大家姐:「我知點幫到你滿足你喎。」
先生走了。
我問大家姐:「邊度幫到佢呀?」
大家姐拎住我個可樂樽:「嗱!」
變態!你想對我樽可樂做啲咩呀?
文:寶豬姑娘
(中女珍寶豬,任職診所助護超過十年,經常使用逆向思維參透世事,包括……細閱大家姐。)
FB:https://www.facebook.com/jumbopig14
〈豬事八卦〉逢周三刊登
專欄屬作者個人意見,不代表本網立場