【now.com生活】有日,一對母子嚟到登記睇醫生。喺等候期間,阿仔跑呀轉呀氹氹轉自己同自己玩得好開心⋯⋯
媽媽就坐喺櫈度邊睇娛樂雜誌邊講:「唔好周圍跑啦,坐返過嚟啦」
重覆咗幾次,佢個仔都冇理到佢,佢就繼續睇雜誌算。
「哎呀」,阿仔趴咗喺地下。
媽媽即刻掉低本雜誌:「咩事呀?」
阿仔趴喺地下單手掂住額頭,之後喊出嚟:「痛呀~~~~」
媽媽行埋嚟登記處,由得個仔繼續趴喺地,佢問我:「你睇唔睇到發生咩事呀?」
我:「唔好意思呀太太,我頭先做緊嘢,睇唔到事發經過⋯⋯」
媽媽深呼吸,我以為佢想令自己冷靜啲,點知原來佢深呼吸係為咗儲氣爆我~
媽媽:「你喺度做嘅!唔係要同我睇住個仔嘅咩?你由得我個仔喺度整親,你就喺度漠不關心咁做自己嘢,你學咩人做姑娘做醫生呀?講唔講得通呀?」
我都覺得講唔通,個仔係你嘅,你自己唔睇住佢,反而睇啲明星花邊新聞,咁關心個明星,唔通單花邊新聞又有你份呀?
我:「不如我哋過去睇吓小朋友點先啦⋯⋯」
媽媽一手抽住阿仔件衫,捉起個仔,好順手打咗個仔背脊一下:「點呀你?整到邊度呀?」
仔指住張櫈掩住個頭:「呢度呀,痛呀」
媽媽望住我:「你張櫈整到佢呀!你有咩可能擺啲明知有可能整到人嘅嘢喺診所呀?仲唔同我拆咗佢?」
大家姐先至行出嚟。
大家姐:「櫈會整到你個仔,消失!枱會整到你個仔,又消失!玻璃門,牆會整到你個仔,消失!你頭先打你個仔,我睇到,你都要消失!」
世界又安靜了。
文:寶豬姑娘
(中女珍寶豬,任職診所助護超過十年,經常使用逆向思維參透世事,包括……細閱大家姐。)
FB:https://www.facebook.com/jumbopig14
〈豬事八卦〉逢周三刊登
專欄屬作者個人意見,不代表本網立場