【now.com】香港地呢個地方已經變質,上一代嘅人充滿人情味,鄰居之間互相幫忙,互相體諒,相反?家嘅人,大多睇鄰居唔順眼,鄰居講嘢大聲啲投訴,小朋友喊又投訴,更極端嘅係乘升降機鄰居唔等埋其他人而投訴。
做物業管理呢行見盡人性醜惡,亦即佛教三毒貪嗔痴。貪,在於有啲客不停投訴,要求管理處派人幫佢屋企做家居維修;嗔,在於有住客喺屋苑違例泊車被鎖,不欲繳交罰款而出手打人;痴,在於將歪理說成道理,把責任推得一乾二淨。
要說出人性醜惡,有時候真係十萬字都寫唔完。作為一個物業經理可以做嘅就只有將呢啲投訴好好過濾,將心力用於幫助真正有需要嘅住客。
偏偏,呢個世界人渣當道,亦因為「今時今日,咁嘅服務態度係唔夠」呢句說話,而煉成香港人乜都鍾意投訴嘅文化。?家嘅客好識玩,唔理個投訴合唔合理都好,只要投訴去總公司或者係高級管理層,咁客人就可以獲得佢滿意嘅要求。
就係咁,識得玩嘅住客好多時候,都會直接去總公司投訴,而上司收到投訴之後,個客有理無理都好,都會話係屋苑主管有問題,因為喺佢哋心裡面,有投訴去到總公司就係屋苑主管辦事不力。
最近同行家傾計,分享工作逸事,佢話有個客投訴樓上單位嘈音,經過了解之後,發現原來樓上單位有個小朋友成日喊,又會將玩具擲在地上而發出碰撞聲,行家經過勸喻,而樓上單位亦承諾會多加約束小朋友,情況雖然有改善,但間歇性亦都會發生嘈音。
就係咁,投訴住客覺得管理處辦事不力,唔能夠做到屋苑單位零嘈音而投訴去到總公司。一次,兩次投訴之後,上司就同行家講話唔可以再有第三次嘅同類事件去到總公司,如果唔係就會發警告信畀行家。
行家有口難言,有苦自己知。如果自己處理問題不力而招致投訴,我相信行家唔會怨上司秉公辦理,但實情係呢類超出管理範圍嘅投訴,管理層都以下屬辦事不力為理由而出警告信,就點講都講唔通。
唔係我特別討厭總公司嘅管理層,我只係覺得上司下屬簡單地槍口一致對外都做唔到,仲有乜資格講Team work兩個字。
對住呢啲上司可以做嘅方法只有一個。
「我幫你唔到,你想投訴就直接投訴去我上司度,佢一定可以幫到你!」
文:庸材
(八十後物業經理,網絡小說作家,喜歡平庸,更喜歡當塵世間迷途小書僮)
FB: https://www.facebook.com/yungchoi2012
〈不是庸材〉每隔周四刊登
專欄屬作者個人意見,不代表本網立場。