【now.com】拉上鐵閘，關好大門。
迎來嘅一句，多數都係「食咗飯未呀？」
你唔耐煩咁講：「得啦，食咗啦。」
但幾分鐘之後，佢總會捧住一碟小菜或者一碗熱湯，
講一句：「你餓唔餓呀？使唔使食啲嘢？」
你反白眼：「咪話喺出面食咗嘢囉！好飽食唔落呀。」
如果有塊鏡，你就會見到自己係幾咁西口西面；
如果有錄音，你就會聽到自己係幾咁西聲西氣。
當然，接受咗你嘅冷言冷語之後，
佢都係保持微笑，沿水平線退後，
不厭其煩咁再講一句：「擺喺雪櫃，你餓就叮返熱啦。」
深深嘆一口氣，你覺得佢太煩，
更唔明佢用咩思考模式會得出
「一個剛剛食完飯的人會肚餓」嘅結果。
自負嘅你暗暗恥笑，直至深夜兩點，
你真係有啲肚餓。
呢個時候，明明斷水斷糧，但突然醒起佢為你準備嘅小食。
原來，佢估中咗，你夜啲就會餓，
即使佢早入夢鄉，但都準備周到。
你一個人企喺廚房，雖然成間屋烏燈黑火，不過依然津津有味。
想同佢講聲「唔該」，但都係「下次先啦」。
夜已深，兩度緊閉嘅房門，隔絕咗你嘅謝意。
你深知道，呢種劇情會不斷循環上演，
只要大家仲存在喺呢個世界入面，佢都會驚你肚餓。
而有時你諗返起，點解自己會「斷水斷糧」？
某程度上都係種依賴，即使你已經唔年輕，但心中仍舊會諗：
「唔使我買啦，或者阿媽有買畀我呢。」
佢冇當你長大過，
你自己都暗地裡不想長大。
文：張晨
（將最不煩的事變成超煩，就是我們的平凡。）
FB： https://www.facebook.com/birdnoup
〈都市無情〉每隔周四刊登
專欄屬作者個人意見，不代表本網立場。
