【now.com】「所有上司都係衰人!」呢句說話聽唔少,亦好多打工仔掛喺口邊,彷彿一開始進入間公司,上司同下屬已經係一個對立,雙方冇可能成為交心嘅好朋友。
由一個普通職員晉升到成為管理層,點樣成為一個受人愛戴嘅上司,一直係一門高深嘅學問,特別係同一班出生入死嘅好兄弟,由同伴變為上司,呢下心理關口同公關能力,處理得唔好分分鐘好易車毀人亡,升職反而變成害咗自己。
細細個遇到太多衰人,鍾意玩小圈子嘅有,寬己嚴人嘅又有,更衰嘅有耍手段迫走同事嘅都有,因為有太深刻嘅經歷,所以要避開成為呢種敗類其實唔難,難嘅反而係點樣學習中庸,做到所有事都公平公正。
細個嘅我唔識拿捏呢種關係,一嚟怕自己被同事話「升職之後扮晒嘢」,二嚟怕一啲資歷比自己深嘅同事唔服自己,所以好多時候都喺度扮好人,對於同事工作處理有問題我唔敢出聲,對於同事進迫嘅私人要求都一一忍氣答應。
起初,我以為咁樣嘅管理手法,叫和諧共融或者係所謂嘅「Team spirit」,一班同事嬉嬉哈哈,收工一齊Happy Hour食飯睇戲,表面上睇上嚟好似開心愉快,實情係見到同事嘅工作表現有顯著下降,而作為屋苑經理嘅我,因為同同事太熟嘅關係,我唔敢出聲話佢哋。
失敗!
最深刻嘅一次係有個同事話家人入院要即刻走,我聽到當然即刻放人,畢竟工作係冇可能重要過自己嘅家人。個同事之後話要處理埋啲手尾,要兩日後先可以返工,我聽到當然話冇問題,仲叫佢唔好擔心工作,其他事情同事會處理好。
兩日後同事返到公司,佢交代話家人已經出院,咁我就叫佢填返張事假表格,畢竟兩日冇返工都要向人事部做返請假記錄。
「請事假?我家人入院有事喎,咁都要扣我假?」同事聽到之後就好激動咁講。
「你冇返工兩日,當然要請事假,有乜問題?」我不解地問。
「你變咗!而家升做經理之後擺官威,你係經理,你話點咪點囉!」講完,同事就簽咗份表格掟俾我。
嗰一刻,我呆咗唔知自己錯乜。
而家諗返起,我嘅錯可能係一直太過好人,對同事放得太鬆而當稍為收緊嘅時候,同事就會唔適應以為我擺經理款。
「中庸之道」呢幾個字,做人做事,永遠冇錯。
文:庸材
(八十後物業經理,網絡小說作家,喜歡平庸,更喜歡當塵世間迷途小書僮)
FB: https://www.facebook.com/yungchoi2012
〈不是庸材〉每隔周四刊登
專欄屬作者個人意見,不代表本網立場。