【now.com】一直以來，我對於新入職員工或者係冇工作經驗嘅年青人，要求都唔會太高。
年青人係一張白紙，入到寫字樓可能連影印機或者係傳真機都未必識用，呢個我唔會怪佢哋，因為曾經年輕嘅我，都試過唔知Hong Kong Bank等於匯豐銀行而入錯數，所以對於佢哋嘅無知犯錯，我一直非常包容。
我亦曾經講過，唔介意多請年青人返工，只希望佢哋透過唔同類型嘅工作，可以搵到一份自己喜歡嘅職業，確定目標後再全力奮鬥，只不過有時候對於仲未開竅嘅佢哋，的確需要一個人生導師在旁給予鞭策。
一間公司，總會有幾個同事會慣性請病假。明明今日見到佢仲生龍活虎，翌日已經同你講話發燒、腸胃炎兼痾嘔肚痛要請假一日。起初信佢真係病，會用電話覆佢「Take care」，後來知佢慣性詐病請病假，就連按鍵睇佢訊息都覺得費時。
公司有個年青人，每個星期日都會參加水上活動，龍舟、wakeboard加水上電單車，每一次佢都會喺facebook分享佢嘅相片，而之後嘅星期一就會慣性請病假。同事唔係白癡，知佢詐病請病假而加重工作量，要做埋佢嗰份而開始有所微言，奈何年青人有醫生紙，其他同事亦都冇佢符。
我叫年青人留意一下自己嘅病假記錄，點知年青人就話自己真係病，而且有醫生紙做證明，話公司甚至係我都冇資格去話佢詐病，就病假而出警告信或者係解僱佢。
上司要玩殘一個下屬，方法有好多亦都可以好邪惡，不過喺我心裡面，眼前嘅年青人只係因為無知，本質唔壞，所以我冇打算向佢做任何事。
我同佢講，一個人嘅將來成唔成功，除咗運氣同際遇之外，最重要就係喺年青嘅時候打好基石。基石可以係工作上面嘅知識，或者係上司與同事間人際網絡，亦可以係自己喺職場上面嘅口碑，不過以宜家呢個情況，佢嘅基石係一粒會殺人嘅癌石。
一份好工，往往係由舊同事或舊上司介紹引薦，以一間公司三十人去計算，詐病請病假嘅代價係放棄咗三十個同事介紹好工嘅機會。
可能你會話，唔止年青人，六七八十後嘅人都會詐病請病假，咁你又可以換轉個角度睇，睇下佢哋現時嘅人工職位去到邊個位置，而佢哋，就係你最好嘅人生反面教材。
職場上冇努力嘅人上唔到位，只有上唔到位嘅懶人。
文：庸材
（八十後物業經理，網絡小說作家，喜歡平庸，更喜歡當塵世間迷途小書僮）
FB： https://www.facebook.com/yungchoi2012
〈不是庸材〉每隔周四刊登
專欄屬作者個人意見，不代表本網立場。
