【now.com】有日大家做嘢都做到岀晒煙，電話響起～
我聽電話：「喂？乜乜診所，有乜幫到你？」
對方係一位男士：「喂？診所呀？姑娘呀？」
我：「係呀～請講～」
佢：「我想問坊間嘅避孕套邊個牌子係最受醫生推薦？」
我：「我哋冇推薦㗎～」
佢：「點解呀？」
我：「醫生冇推薦就冇介紹……」
佢：「咁我去你哋度買有冇得介紹呀？」
我：「我哋診所都冇賣避孕套……」
「避孕套，避－孕－套」，呢幾個字刺激到正在執藥嘅大家姐，好似為佢腦袋帶嚟無限衝擊。
大家姐笑住咁行埋嚟我身邊，示意俾電話佢聽。
大家姐接過電話：「喂？先生？係咪想問避孕套嘅問題呀？有冇鍾意吔開啲乜生果呀？」
佢（由大家姐事後講返我知）：「我鍾意食乜生果關你乜事？」
大家姐：「有好多隻味㗎喎，要俾錢嘅有得揀，梗係揀隻鍾意㗎啦！」
佢：「西瓜？」
大家姐嬌聲嗲氣：「你唔問吓我鍾意乜味？」
我打咗個冷震，由內寒到外，再由腳趾尾寒到上頭頂……怎麼怪怪的？聽落呢個問題好似好正常，但係又好似伏味濃！喂！先生！收線呀！cut線呀！有危險呀！走啦！俾我就立即扮打錯電話問天氣啦！
佢唔爭氣問咗：「你鍾意乜味？」
大家姐：「士～多～啤～梨～」
佢仍然未load到有乜問題：「哦～」
大家姐唔放棄：「我都好耐冇食士多啤梨啦！」
我眼都凸埋咁望住企到丁字腳pose嘅大家姐。轉個頭，大家姐好輕力咁放低電話轉身……佢個樣話咗俾我知係衰咗，不過人係有好奇之心㗎嘛，咪追問吓關心吓～
我：「嗯？講完啦？」
大家姐：「嗯……」
我：「有冇士多啤梨食呀咁？」
大家姐好失望：「佢……叫我撩鼻屎……食自己……」
……唔叫你撩pp食便便，應該算好？唔好咁失望啦，下個可能請你食榴槤呢？
文：寶豬姑娘
（中女珍寶豬，任職診所助護超過十年，經常使用逆向思維參透世事，包括……細閱大家姐。）
FB：https://www.facebook.com/jumbopig14
〈豬事八卦〉逢周三刊登
專欄屬作者個人意見，不代表本網立場。
