【now.com】於韓國首爾東大門設計廣場（DDP）展出，風靡全球遊客的Light Rose Garden將會嚟香港喇，睇LED花海終於唔駛搭飛機！韓國創作團隊PANCOM決定將玫瑰花海展覽開遍世界各地後，首站就選址香港，仲揀正2月14至22日中西情人節同大家見面，好幸福呀！
韓國個燈海大家有冇睇過？
原本預計於韓國僅展出一個月，但因反應熱烈，一再延長展出時間，最新資料係會到2月29日。
原來PANCOM團隊花了六個月籌劃今次香港站，根據海濱及添馬公園地形及環境度身設計花海，屆時將會有約25,000朵LED白玫瑰照亮中環海濱夜空。主辦單位又好細心，知道好多愛侶親朋會到場打咭放閃，特別安排幾個最佳selfie／拍攝位置，等大家以最佳角度保留浪漫動人的一刻，識影記得mark實幾個影相位！
高樓大廈下的「玫瑰燈海園」又另一番感覺。
Light Rose Garden香港站帶來浪漫玫瑰花海外，亦與香港公平貿易聯盟合作，義賣由本地社群及婦女人手嵌製的「Light Rose」玫瑰感應燈，限量5,000朵。「Light Rose」玫瑰感應燈，備有blow-to-glow（吹氣發光）裝置，只要輕輕一吹，「Light Rose」便會慢慢點亮，每一朵盛載著光芒的愛的同時，也為公平貿易添一份力量，讓這份溫暖照亮更多心靈。由即日起可到 www.lightrosegarden.com 訂購，於情人節前夕（2月13日）起至2月23日期間於中環PMQ元創方、山頂廣場或Fashion Walk食街領取。
一枝咁送都好得體，伴侶實鍾意！
而且著燈唔著燈都好靚。
為配合西方情人節及中式元宵節不同浪漫氛圍，「Light Rose Garden玫瑰燈海園－香港站」將會分兩部分，首階段情人節（2月14至16日）將於中西區海濱長廊展出，讓市民以維港優美景致作背景留下溫馨浪漫一刻；後段元宵節（2月20至22日）則移師至毗連的添馬公園展出，背景隨即變成最能代表香港繁盛一面、高樓大廈林立的中環商業區。至於2月17日至19日，花海「遷徙」期間仍將繼續局部開放，讓市民繼續感受愛的氣氛。
