【now.com體育】話說於6月頭小妹某段文字中提到自己撐德國,皆因德國陣容「前中後都係世界級」。有朋友質疑,話幾乎所有國家隊人腳都係世界級架啦,有咩咁犀利?咁我惟有改一改:「德國連後備兵都係世界級」! 撰文:Kate Wong老師
是次功臣馬里奧葛斯其實已於淘汰賽沉寂了一段時間。還記得於分組賽對葡萄牙時他用「雙頭」頂入後就再無正選之席了,而他以後備身份出場時間亦不多,今場落場僅32分鐘便射入一球世界波,仲要係奠定勝局的一球!世界級!
缺少了熱身時受傷的基迪拉,小豬的責任變得尤其重要。小豬今場主力防守最具威脅性的美斯,特別搏盡,搞到頭破血流也在所不計!最後成功令美斯未能憑一己之力扭轉困局!世界級!
後防猛將曉姆斯於今屆世界杯相當穩陣,成功瓦解不少高空攻勢,成為德國隊一道堅固的城牆,而且不時上前助攻,更在8強時一箭定江山助球隊晉級!世界級!
紐亞可說是當今世上數一數二的門將。他經常及時在禁區外替球隊解圍,就似足球小將中的健威,能隨時出迎挽救未能及時回防的後衛。世界級!
不得不提軍師路維精密的用兵部署,其深思熟慮,可見一斑。在他的領軍下,每場比賽的正選名單都有變動,他的戰術部署,臨場調動都反映了他對足球和球員的深入了解!最終一邊挖鼻一邊協助球隊成功過關斬將勇奪大力神盃!世界級!
其實,德國隊最世界級的是球員間的合作性。都說了,足球呀,是講teamwork的!