【A&M Diary】近排港人喜愛北上，除咗去超級市場掃貨之外，亦喜歡捐窿捐罅搵食，而主打客家菜嘅客語，更成為其中一間受港人喜愛嘅人氣餐廳。我哋排咗成個鐘，大約晚上7:30左右入座，但客語客家菜所有招牌菜都已經賣晒，而菜單亦只有少過一半嘅選擇，但我哋太肚餓喇，有咩就食咩啦！
撈南昆山腐竹
話說坐低後，經點菜紙落單，但店員話，喺呢八個餸當中，只有一個餸仲有；重新落單後，店員話當中只得兩個餸未賣晒，而店員話依家只有少過一半嘅菜式尚有存貨，好啦求其叫咗幾個餸，諗住落咗單即係無問題啦，點知坐坐吓，店員又話賣晒，其實本身有啲燥底，但內地嘅店員真係好有禮貌，所以是但啦，已經餓到肚扁。歡迎我哋第一道菜：撈南昆山腐竹。呢個數冇乜刻意嘅調味，反而食到充滿山水味嘅腐竹，豆味香濃，腐竹滑溜。
鮮花椒蔥油鱸魚
鱸魚預先起骨，所以食嘅時候啖啖肉，配上花椒同蔥油，香口又惹味。
梅縣菜乾煲
所有招牌菜都售罄，而除咗上面嗰兩個餸之外，其他餸我都覺得麻麻哋。呢個梅縣菜乾煲，配料只有菜乾同梅菜，但味道鹹味不足，唔係送飯之選。
蒜香排骨配薯條
蒜香味濃，但炸得太乾，唔太推薦。
涼瓜啫啫牛肉煲
相信涼瓜無預先飛水，所以涼瓜比較苦，但苦嘅涼瓜其實更深得我心，扣分位其實係牛肉。牛肉細到肉碎咁，又硬又韌。
