【Now新聞台】截至早上11時止，1小時內《彭博》用戶關注度上升最多港股，依次為比亞迪股份、阿里巴巴、碧桂園、萬科企業及理想汽車。
比亞迪股價連續兩個交易日喺大成交下急挫，A股及港股同樣慘烈，其中，H股現價低於220元。上周有消息指比亞迪減價，但公司就澄清唔係官方減價，只係加快油轉電嘅策略，優惠只限於11月，但比亞迪股價今朝繼續跌，係咪市場擔心公司為咗跑數擴大減價範圍？華為幾款主打車係比亞迪豪華車直接競爭對手，市場擔唔擔心來自華為嘅威脅？
富昌證券聯席董事譚朗蔚認為，減價陰霾都會持續，不過，由於比亞迪一直維持較高毛利率，相信仍有空間水位。佢又話，可能個別經銷商及車款做年底促銷，相信對全盤大數影響唔大。
佢又指，比亞迪有垂直供應鏈，包括芯片、電池及電能車，「護城牆」好大，而之前面對表現不俗嘅「造車新勢力」都未受太大影響，相信來自華為嘅威脅唔大。
