【Now新聞台】截至早上11時止，1小時內《彭博》用戶關注度上升最多首5隻港股，依次為百度集團、阿里巴巴、比亞迪股份、中國恒大、滙豐控股。
百度昨晚(22日)公布嘅第3季業績扭虧為盈，收入、純利都高過市場預期，今朝股價反應唔錯，一度升6%，高見114.2元，中午收市仍升5%，百度係咪終於打破近期績優股不升反跌嘅宿命？
資深證券分析師彭偉新指情況唔同，小米集團(01810)等績優股放榜後向下，主要係業績前已傳出唔少正面利好消息，投資者已偷步炒高股價，百度最新表示，今季「文心一言」人工智能(AI)大模型有望開始貢獻盈利，有利後市股價。
Castor續指，大行給予百度目標價平均約175元，距離現價仲有約60%水位，認為預測唔算進取。佢解釋指，百度由去年10月約75.2元衝上至今年2月高位166.3元後，累計已回調逾61%，今日出現1支大陽燭，仲補埋10月19日嘅下跌裂口，相對強弱指數(RSI)又回升，反映技術走勢已經轉強，只要股價短線升穿50天線，即106元水平後，就可以視為完成回調，下一站可以留意145元。
