【Now新聞台】截至早上11點，1小時內《彭博》用戶關注度上升最多的港股，依次為雲頂香港、國泰航空、海螺水泥、中國海外發展及華潤置地。
內地近日開始放寬貨幣政策，最新貸款市場報價利率(LPR)聽日就會出爐，LPR作為房貸參考基準，投資者似乎憧憬當局會下調利率，帶動內房股今日幾乎全線反彈，不過，一向快一步收到風嘅內地股民，反而冇炒內房股，今日入定貨等聽日爆上值唔值博？
耀才證券研究部經理譚智樂指，睇返《彭博》數據，市場普遍預期，人民銀行唔會急於喺聽日下調LPR，可能會喺農曆年假後先出手，所以今日買定內房股其實唔值博。
Arnold唔建議投資者喺現水平高追任何內房股，坦言即使買國企如中海外、潤地，都唔會點受惠下調LPR嘅消息。佢又解釋，唔少內房仲有好多表外負債，違約風險或於未來3至4個月逐漸浮現，就算LPR低咗，喺還債問題上都幫唔到手。
