【Now新聞台】截至早上11時,1小時內《彭博》用戶關注度上升最多嘅港股,依次為中國華融、保利物業、永利澳門、金沙中國有限公司及歐舒丹。
保利股價今朝一度抽升逾20%,集團噚晚出通告,計劃推出限制性股票激勵計劃,期限長達10年,計劃有別於一般發新股嘅做法,而係會委托代理喺二級市場買公司股份。不過,計劃未通過之餘,期限又長,點解股價會大升?
京華山一國際研究部主管彭偉新指,相信投資者係借勢炒呢個消息,多於真係睇好呢個計劃,保利有央企背景,較難透過市場做回購撐股價,呢個計劃可以變相取代回購,達到相同效果。佢又話,保利估值平,計劃可以振作軍心。不過,買幾多股及獎賞方式先係重點,如果兩者都設有上限,股價好難長升長有。