【Now新聞台】截至早上11點，1小時內《彭博》用戶關注度上升最多嘅港股，依次為華潤啤酒、百威亞太、比亞迪股份、阿里健康、金沙中國。
內地啤酒股造好，有分析指，產品加價可能會成為成股價催化劑。當中潤啤獲摩根士丹利加持，預期未來60日，股價好大機會上升，主要係潤啤近期捱沽，估值變得吸引，而潤啤高端產品業務仍然穩健，投資者對啤酒股估值有重新評價嘅時機已到？
京華山一國際研究部主管彭偉新指，以往啤酒好少喺冬季加價，相信主要係因為整體商品價格急升，令啤酒原材料，例如鋁罐包裝同大麥都明顯貴咗，所以製造商唯有以加價形式，將成本轉嫁至消費者。冬季做價格調整對整體市佔率流失影響相對少，因為可以畀市場習慣新價格，咁會對下年啤酒銷售旺季有利，不過，股價喺短期內好難扭轉劣勢。投資者可趁依家啤酒股估值平買入作長缐投資。
