【Now新聞台】截至早上11點，一小時內《彭博》用戶關注度上升最多的港股，依次為友邦保險、移卡、中遠海控、港交所及中國聯通。
友邦股價今早破頂，一度高見95.5元，並貢獻恒指逾90點升幅，成為撐市主要功臣，美國總統特朗普終於簽署總值23000億美元嘅紓困方案，會唔會成為港股利好因素？
圓通環球金融集團行政總裁曾永堅指，呢個因素有助吸引資金持續流入友邦，加上今季市場資金紛紛回流至傳統板塊，而新冠病毒疫苗陸續面世，以及長債孳息唔會持續回升，亦都係資金回流誘因，而市場普遍睇好友邦明年保險銷售及盈利。
佢又話，雖然恒指改革會降低友邦權重，但呢個係市場預期之內，而對恒指指數基金嘅影響，未必係想像中咁大，更重要係，要留意友邦喺2021年宏觀環境下嘅業績前景同表現。
