【Now新聞台】截至早上11點，《彭博》Top Search No.1 為瑞聲科，第2至第5位為交通銀行、比亞迪股份、中國銀行及ESR。
本身係蘋果概念股嘅瑞聲，噚日有蘋果智能手機iPhone熱賣嘅消息，加上有市場調查指，蘋果首季高端智能手機銷售排名獨佔頭四位，都帶動瑞聲「炒一轉」。但最新有傳蘋果，將部分產能轉至印度，喺呢個敏感時期，對蘋果嘅內地銷售會唔會受影響？
大華繼顯執行董事梁偉源指，雖然蘋果手機仍存在優勢，但近日內地品牌手機，市佔率亦有上升，加上估計下半年內地5G手機銷售會增多，令蘋果嘅優勢有機會收窄。而蘋果印度設廠，以目前嘅競爭環境，以及中美關係，都對蘋果喺內地銷售不確定因素增加。除非蘋果喺價格競爭上顯示優勢，否則瑞聲好難透過蘋果消息帶動股價升勢。
