【Now新聞台】截至早上11時止，《彭博》系統Top Search No.1為H&H國際控股，第2至第5位依次為昆侖能源 、小米集團、中國金茂及華潤啤酒。
本港第二隻同股不同權股份美團點評，今日啱啱上市半年，上市前投資者同基礎投資者禁售期屆滿可以沽貨，呢批解禁股份涉及41億股咁多，集團業績麻麻，再加上同行競爭大，投資者沽貨誘因都幾大。
本港舊年4月開始容許新經濟企業以同股不同權架構上市，但新制實施近一年，只得小米同美團成功上市，加上新經濟企業估值大跌，令這類公司以同股不同權形式來港上市嘅誘因大減。事實上，依家仲有好多隻新經濟股潛緊水，究竟市場之後係咪仲願意畀更高估值新經濟股，就要繼續留意。
