【Now新聞台】截止早上11時止，《彭博》系統Top Search No.1為中國旺旺，第2至5位依次為騰訊控股、領展房產基金、北京汽車及新濠國際發展。
騰訊延續過去八日跌勢，一旦今日收市都升唔番上去，跌足九日，將會超越2010年1月嘅八連跌紀錄。另外，雖然多間券商都降騰訊目標價，但據《彭博》統計，98%券商都維持「買入」評級，冇一間畀「沽售」評級。
Now財經台評論員趙善真話，對高增長股嚟講，其實更應該將資金用於收購或拓展業務，繼續壯大，而唔係用嚟回購，所以即使騰訊頻頻回購，亦冇咩吸引力，救唔到股價。趙Sir又話，現時政策面仍然對騰訊不利，可謂由「得寵」變「失寵」。不過，始終騰訊已累積一定跌幅，加上以前係唔少人嘅愛股，所以大行較難叫人沽。
