何鴻燊兒子何猷君於微博發文，話自己同朋友乘坐香港航空的班機前往上海，朋友護照遺留機上，求助航空公司不果，晚上要滯留機場等過夜。（微博截圖）
【now.com】世界貧富懸殊問題嚴重，有錢人擁有特權係眾所周知嘅事，基本上成日都會發生。但由有錢人講返自己嘅特權事件，仲數得出唔公平嘅地方，就真係少見。
何鴻燊兒子何猷君，即係四房梁安琪個仔、何超盈同何猷亨個細佬。話說佢有頭等機唔搭，陪一齊創業嘅朋友搭香港航空經濟艙去上海，佢朋友唔小心漏咗Passport喺機艙，過唔到關，航空公司應承幫佢哋搵，但又唔做嘢，一味拖延，結果佢哋要在機場瞓咗七粒鐘。直至第二朝有職員認得佢係賭王個仔，大為緊張，唔使十分鐘就搵得返。
呢啲通常都係我哋啲窮人抱不平嘅事，由何猷君講出嚟格外諷刺。當然件事佢係做得啱，而且做得好。記得上年差唔多時間，特首個女梁頌昕先表演完乜嘢叫特權，起碼何猷君都冇打畀何鴻燊然後遞個電話畀航空公司職員，再叫佢「叫我賭王」，特事特辦。呢件事上，猷君一直嘗試用自己方法去解決件事，而唔係用自己身份。
又或者，同一單新聞咋嘛，猷君都冇指住自己個鼻威嚇職員：「我老豆係何鴻燊，全澳門最大家族第一把交椅！」佢只係陪朋友瞓機場，默默地、耐心地等消息，同我哋呢啲窮人一樣。
雖然話唔需要因為一件事而即刻捧到佢上天，但今次的確睇到，富二代都可以有家教嘅。話說香港人對富二代有根深柢固嘅反感，咁佢哋的確係「贏在起跑線」，出世就有特權嘛！加上好多富二代嘅奇怪言行，好多時有錢反而被睇唔起。但香港人普遍係公平嘅，偶然遇到個貼地嘅、有家教嘅，係會即刻讚返你。其實我哋呢啲窮人嘅要求都好低，你似返個人，講返我哋嘅Language，就係自己人喇，唔係好高門檻啫，我估。
何鴻燊兒子何猷君於微博發文，話自己同朋友乘坐香港航空的班機前往上海，朋友護照遺留機上，求助航空公司不果，晚上要滯留機場等過夜。（微博截圖）
航空公司事後更新微博，同公眾交代事件又向猷君致歉，不過猷君就反向航空公司道歉話不該使用服務。（微博截圖）
現年22歲的何猷君（上排左三）是賭王何鴻燊及四房太太梁安琪兒子。（微博圖片）
何猷君最近同朋友齊齊合夥做生意，常常要飛到上海。（微博截圖）
雖然猷君貴為賭王兒子，但去年於外國讀書期間都會自己做家務。（微博圖片）
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
