【Viu】由新城電台主辦嘅《周禮茂作品展》今晚喺主題公園舉行，Kelly陳慧琳打頭陣獻唱，期間頻頻出現技術故障！當Kelly準備唱出道作《一切很美只因有你》嗰陣，佢向樂手表示耳機冇聲；後來喺Kelly臨唱《風花雪》前，佢講返當年憑呢首歌獲金像獎「最佳原創電影歌曲」，手上支咪又突然冇聲，工作人員多次上台換咪無果，Kelly機智執生叫fans幫佢影相拖時間，但以為有返聲嘅Kelly繼續keep住唱，首歌唱咗三分之一先真正回復正常！
事後Kelly指首次嚟新場唱歌，rehearsal嗰陣覺得好好玩，點知on show就「畀人玩」！耳機、咪高峰輪住故障，Kelly樂觀話當係舞台上嘅蝦碌事，但坦言耳機冇聲嗰刻係最淆底，最後都豁出去繼續唱！講到佢日前趁喺內地巡唱嗰陣，初嚐busking滋味，大叫好玩！Kelly直言想喺香港都玩一次快閃，或去踩其他busker嘅場！
是晚Sammi鄭秀文雖然未有現身，但都預先錄定祝賀片段賀周禮茂！壓軸出場嘅係「媒人」張敬軒，原來呢個騷開得成，係因為軒公提議周禮茂㗎！做訪問嗰陣軒公透露周禮茂plan緊去更大場地，又話希望好快可以成就解鎖，獲周禮茂賜份靚詞，主題上想話係行sexy路線喎！
軒公嚟緊有多個大型演出活動，佢抵死笑話要搵「奶粉錢」！事緣軒公終於的起心肝操弗，跟教練行德國特種兵方式，每朝8點鐘gym room報到，日食5餐，所以佢依家出去做嘢要帶8個飯盒！軒公又講到教練有特別order食蠔，呢樣最令佢費解，究竟係想補乜呢？軒公個dream body又係點？睇足本訪問片啦！
