【Viu】Elva倪晨曦、湛琪清兩位懷孕靚媽今日喺銅鑼灣出席朱古力店開幕活動，Elva第三位囝囝下月就出世，但佢真係天生麗質，腳踏斗零踭高踭鞋，手腳依然纖瘦，佢話肥咗約30磅，唔介意繼續增磅，令BB健康啲。
今日520呢個咁sweet 嘅日子，Elva竟然完全唔記得，笑言如果老公幫忙湊仔已經係最好嘅禮物，而佢為咗搵奶粉錢，更加可以做到生仔前兩日添，母愛無敵呀！對於同樣懷孕中嘅連詩雅飲珍珠奶茶惹熱議，Elva話有時都幾難忍口，但適量甜食其實可以接受。
Elva 4年抱3，因為有晒經驗，走佬袋都唔使咁快準備，問到恨唔恨追多個女，佢笑話唔敢再講封肚，睇緣份，而兩個仔都好期待弟弟出世。提到破壞黃家駒墓碑嘅兩男都係網紅，兼喜歡搵明星影相，Elva表示睇到新聞會唔開心，佢話有一個理由好難拒絕合照，但同fans會保持距離。想睇呢位靚媽有幾咁fit，快啲入嚟睇片。
