【Viu】台灣天團五月天一向勁寵香港「五迷」，每年堅守「五月之約」嘅約定嚟香港開騷！不過今年巡唱香港站頭場日子定喺尋晚4月30日，五子搞笑形容為「五月之約搶先場」，其實你哋幾時嚟香港開騷，五迷都絕對無任歡迎呀！
事隔一年再見香港五迷，五子笑話開騷前個感覺都唔太真實，直到真係踩上舞台就好sure身在香港，特別係成員瑪莎，佢大笑話由唱第二首歌開始就全身濕透，爆汗勁sexy，呢個就係香港專屬嘅濕熱天氣！
呢次五月天一共會開7場中環海濱騷，五子指呢段時間都會stay喺香港，成員冠佑話出街會有五迷同佢揮手，主音阿信即刻笑問係咪喺餐廳？係咪想叫話幫手埋單？笑cry呀！
適逢五月天今年出道25周年，佢哋以時光機做概念，同五迷去返以前，熱唱多首經典金曲，送五迷驚喜！獻唱《戀愛ING》時，佢哋仲坐住一部紅色辣跑，駛出台前勁近五迷，令全場2萬五迷high爆齊喊：「LOVE！」當然唔少得點歌環節，唔少五迷落足心機整banner吸引五子注意，成功點唱《勇敢》、《好不好》、《彩虹》、《後青春期的詩》4首歌！另外，雖然天文台預告會落雨，但大半場騷都勁好天，五子自爆勁擔心天氣，一直都避開唔講個「雨」字，不過到最後都走唔甩，撞正黃色暴雨警告信號，首場個唱喺暴風雨之雨提早結束！
