【Viu】「準影后」Jennifer余香凝、溫碧霞、陳浩民夫婦、沈震軒、翁嘉穗、簡淑兒同男友麥大力等，今晚現身電訊品牌活動。其中久未露面嘅陳浩民同麥大力都係負腳傷撐拐杖上陣，認真畀面！
啱啱同成班姊妹去上海旅行嘅Jennifer，話雖然只得短短兩日，但全程喪食、喪買勁relax！自Jennifer入圍金像獎影后後，啲job接到唔停手，佢指好感恩有咁多機會，個庫房可以儲備多啲，至於身價方面都仍然係開心價！另外，主演電影《白日之下》嘅原型，康橋之家前院長張健華涉性侵女院友遭索償，敗方張健華須賠約83.5萬，Jennifer指有留意報導，尊重法庭嘅裁決，加倍感電影的確可以令大家更關注社區上問題。
陳浩民指早兩個星期着拖鞋落樓梯差錯腳，諗住小問題就不了了之，最後照X光發現骨裂，要着boot 5個星期！不幸中之大幸嘅係5月先入劇組，所以都有時間休息，自爆有被仔女笑論盡，又幽默笑指依家更加追唔到長腿老婆Lisa蔣麗莎！而Lisa亦有腳傷在身，早前旅行玩浮潛撞落珊瑚，腳上嘅「瘀痕」其實係疤痕，但佢睇得勁開話係特色！
