【Viu】賀歲片《盜月者》宣傳攻勢一浪接一浪，噚日導演袁劍偉同Edan呂爵安快閃尖沙咀、銅鑼灣鬧市，大派電影限量版揮春同手幅，過千「爵屎」塞爆兩邊有利位置，相信有睇片嘅你哋實feel到有幾熱鬧同墟冚！
首次參與落區快閃活動嘅Edan直言心情期待又興奮，同平時謝票係完全兩個感覺！講到同爸爸一齊入場睇戲，Edan笑話係一個好難忘嘅體驗，更沾沾話爸爸讚佢演得好好，搞到佢鬼死咁開心呀！計埋呢次，Edan話已經係第三次睇《盜月者》，仲形容為「百看不厭」：「再入戲院睇嘅原因係想聽一聽旁邊觀眾嘅反應，呢齣電影真係可以睇好多次，每一次睇唔同角色個反應，第二次我主要睇自己，第三次就可以睇張繼聰、白只，感覺都幾有趣！」唔知Edan之後又會唔會再睇呢？入場嘅觀眾可以留意下附近有冇Edan出現呀！真係好刺激呀！
另外，《盜月者》繼榮幸獲邀成第19屆大阪亞洲電影節嘅開幕電影後，最近再傳嚟喜訊，電影獲選今年、第15屆金馬奇幻影展嘅「特別放映」，恭喜晒！
