【Viu】劉嘉玲趁今日情人節出動派心心！佢冧話年年情人節都會同老公梁朝偉撐枱腳食大餐，仲會交換禮物添，真係甜到痺呀！唔知劉嘉玲最開心收到偉仔邊份禮物？今年佢又想收咩禮物呢？
適逢農曆新年，劉嘉玲笑話為咗keep住弗爆身材要勁忍口，又講到每年嘅新年嘅指定動作就係同桃花合照送祝福，而原來呢個「傳統」背後隱藏一個同好友張國榮有關嘅故事！
偉仔下個月就飛德國拍新戲，身兼其經理人嘅劉嘉玲就梗係會陪飛貼身照顧，唔知憑《金手指》再被提名角逐金像獎影帝嘅偉仔，到時會唔會出席影壇盛事？順帶提起近日兩公婆sweet住去大球場搵碧咸合照一事，劉嘉玲笑爆話以後喺間房影相，點知出到球場見到4萬名球迷都嚇一跳，驚係驚偉仔社恐調頭走呀！
另外，劉嘉玲呢排拍緊一個內地綜藝節目，邀請一班好姊妹亮相，例如有「Do姐」鄭裕玲、楊采妮等，佢話有計劃下一季搵全男班，唔知除咗首選嘅偉仔之外，仲想搵邊位男神？又會唔會搵小鮮肉？劉嘉玲話雖然暫時唔認識MIRROR，但會搵12子嘅歌、訪問了解吓咁話！
