【Viu】《ViuTV 2024》節目發布會今日隆重舉行，先介紹「生啤」同「生菜」嘅新夥伴「生氣（Sound Hei），原來佢係ViuTV頭號Hater，專派「腐皮」，但越嬲就越要睇，認真搞鬼！
除咗「生氣」搶鏡外，席間推介七套ViuTV原創劇，包括由廖子妤、陳湛文同Phoebus吳啟洋主演嘅《瑪嘉烈與大衛系列 絲絲》；強尼、張達倫、陸駿光、陳子豐同Gao沈貞巧主演嘅《出租大叔》；周家怡、周國賢、王家晴、陳安立同李炘頤主演嘅《無人之境》；強尼、岑樂怡、王頌茵同米露迪主演嘅《弊傢伙 我要去祓魔》；邀得朱茵加盟嘅《反起跑線聯盟 2》，呢套都有強尼㗎！7套佔咗3套，果然係「全能強尼」呀！
當然唔少得MIRROR成員嘅劇集啦，包括Lokman楊樂文主演嘅《17年命運週期》；鄧麗欣、毛曄穎、何洛瑤、Stanley邱士縉喺台灣取景嘅《島嶼協奏曲》。
此外，改編自大熱韓劇嘅《社內相親》亦即將首播，Anson Lo盧瀚霆同Edan呂爵安亦化身「霸道總裁」同「暖男秘書」宣傳劇集，真係萬眾期待呀！
