【Viu】MC張天賦中秋節開始，舉行兩場首個個人澳門演唱會《This is MC LIVE IN MACAU》，噚晚(1號)圓滿成功！處男開騷，MC就已經創下會場四面台單場入場率最高的佳績，認真犀利！佢仲搵嚟澳門實力歌手小肥擔任兩晚嘉賓，分別合唱《寵物》同《時光機》，二人喺台上自嘲外表，表示可以組成最新組合「小矮小肥」，小肥仲話組合外號可以係「M Fat」或者「Medium Fat」，笑爆全場！MC繼續用身高開玩笑：「我一路尋找緊矮過我嘅人做嘉賓，大家都知我著緊鞋墊，他朝一日搵到矮過我嘅人，就會除咗鞋墊好自信企喺佢旁邊！」小肥就拎出身份證，證明自己有172cm，亦透露咗澳門身份證係會列明身高。
今次MC將香港紅館演唱會原汁原味帶到澳門，同樣以四面台示人，再加碼唱出香港個唱後推出嘅新歌《抽》以及《與我無關》等，但一輪勁歌熱舞後，MC已經爆汗變成水人，仲搞到耳機「水浸」添，好彩有「賦二代」醒目遞上紙巾，亦有唔少fans見到MC飲水嗰陣即刻尖叫，MC笑言：「幾好，飲水都有人嗌！早知我唔排舞排得咁辛苦啦，啲尖叫聲差唔多！」而歌迷最鍾意嘅超市手推車環節，澳門站就改裝成漢堡包車，非常搞鬼！
喺演唱會尾聲，MC回憶起上次喺香港紅館個唱尾場哭成淚人，今次就希望同「賦二代」開開心心咁合唱《時候不早》，最後成功以笑容代替淚水。另外MC為咗感謝台前幕後努力，自掏腰包拎出六位數字換成籌碼，喺慶功宴上親手送給每位工作人員，答謝大家辛苦幫手，更希望為大家帶嚟好運同祝福。
