【Viu】Eason陳奕迅用咗一個多月嘅時間進行北美站巡演，此行打破咗兩項記錄，除咗創下首位華人歌手喺北美Arena開六場演唱會，仲係首位踏足San Francisco Chase Center開騷嘅亞洲歌手，Chase Center更特別為佢訂造一件刻有演出年月日嘅演唱會同名「FEAR AND DREAMS」黑色外套作紀念，威威豬呀！
目前完成六站演出，Eason指每一站都好難忘，北美站去一個月只唱6晚，一反以往巡演趕餐懵傳統，有足夠時間畀聲帶休息，同時可以enjoy當地城市、同舊朋友見面，仲可以去睇網球賽兼shopping添：「竟然買咗幾塊網球拍，係Chicago仲迷上咗一樣新運動，叫做Pickleball，唔覺意又買咗幾塊拍。」
網傳Eason溫哥華門票賣得唔係咁好，而事實係全場爆滿，Eason又「吹神」上身笑話：「聽講你哋係慣咗買飛買得好慢，我差啲諗住取消佢㗎啦！」溫哥華場係北美站last唱，所以Eason賣大包encore 3首歌，又忍唔住自爆好消息，就係事隔5年ready再出新歌，更話係已經錄咗好耐，係同演唱會好有關係，至於詳情就稍後再公布！完騷後Eason留喺溫哥華過中秋，笑話之後返香港就要收拾心情，為10月澳門嘅9場演唱會做準備！
