【Viu】古天樂出席銀行活動，同新加坡米芝蓮大廚齊齊設計菜單，仲分享理財同飲食心得。笑問古媽媽係咪「財政大臣」？古仔笑言媽咪主力負責「洗」，「洗衫」咋！至於飲食心得，古仔自爆最愛食肉餅，雖然廚藝唔算勁，但煮西餐都食得入口嘅！咁如果女仔係「地獄廚神」又會唔會扣分呢？古仔又搞Gag話只要唔係日本人「長期地獄」就OK，So Funny！
講到古仔早排獲《紐約亞洲電影節2023》頒發「亞洲影壇非凡貢獻大獎」，佢話會去當地領獎，但只留幾日就要返港拍戲，預計全程喺暈住捱時差中渡過。古仔又話最近忙緊同台灣男神彭于晏拍電影，秉承香港傳統，夏天拍冬天戲，熱到甩肺，加上近日雷雨影響，連收音都出事，好彩有「開心果」彭彭解悶咋！
