【Viu】一連7場的「許冠傑此時此處演唱會2023」噚晚嚟到第6場演出，Sam Hui請嚟有7、8年時間沒見嘅契仔古巨基擔任嘉賓 ，佢一出場就同契爺合唱《沉默是金》，唱完歌基仔就話：「Sam哥，我想在此多謝你，因為今次已係我第2次做你嘉賓。我們所有Sam哥嘅歌迷都要多謝你，因為你嘅歌陪伴我哋，俾咗我哋好多力量。」然後基仔再帶動全場歌迷一齊高呼「歌神，許冠傑！」，場面非常震撼！
演唱會上基仔仲帶咗特別道具紀念板上台，同大家分享與Sam哥嘅相處點滴，表示紀念板上嘅字同圖案、星星裝飾，都係Sam哥親手畫同貼上去！Sam哥除咗音樂成就以外，仲係一位好細心，對所有朋友後輩都好貼心嘅人。演唱會導演同基仔講，Sam哥每日返到紅館，第一時間要做嘅事就係將要送俾嘉賓嘅紀念板貼好，真係超warm啊！然後Sam哥再同基仔合唱，電影《新最佳拍檔》中Sam哥同哥哥張國榮嘅合唱歌《我未驚過》，令歌迷耳目一新！
