【Viu】Renci楊偲泳孖「鏡嫂」Luxi一齊出席情人活動，問到情人節有咩節目？Luxi笑話冇特別plan，不過就同Lokman興玩補祝，一年一次過慶祝幾個節日，又sweet爆話轉頭會去買禮物。
而Renci就勁醒目話會帶張振朗入戲院睇幾次《毒舌大狀》，當係情人節禮物同時又順道谷吓票房！講到噚晚千人慶功宴阿Dee做找數真漢子勁歌熱舞兼除褲，Renci笑話當時同王丹妮睇到O晒嘴，事後爆阿Dee好着緊咁問「有冇走光？」至於佢就話今日露咗少少頸出嚟就當找數，仲拉埋王丹妮落水話騷長腿，對比阿Dee除褲好似唔係好夠誠意咁喎！
Luxi抵錫話遲啲都會幫Lokman主演嘅《命案》宣傳，又指對拍戲都好有興趣，因為夠晒貪玩，加上笑話男朋友讚佢夠搞笑，不過就未想咁快同Lokman情侶檔演出，一嚟驚有壓力、二嚟怕做嘢會嗌交！至於Renci就竟然要阿Dee唔要男朋友，仲預告同阿Dee年尾再有套電影，打正旗號做兩公婆冧冧豬添呀！
