【Viu】陳法拉噚日出席品牌活動透露主演電影《贖夢》已經煞科，仲笑話係人生中最快拍完嘅一部電影，好快就會飛返美國黐番住囡囡同老公，趕得切同屋企人一齊過農曆新年，又冧爆話囡囡識得逗利是更開心！法拉放聲講到如果之後有其他作品邀約、又啱期都唔介意做「空中飛人」。
第80屆金球獎頒獎禮日前舉行，楊紫瓊憑《奇異女俠玩救宇宙》成首位亞洲人封金球影后，曾合演《尚氣與十環幫傳奇》嘅法拉話好戥對方開心，見證亞洲演員喺國際舞台佔一席位，同樣勇戰荷里活嘅佢話希望之後可以接一啲挑戰自己、騷演技嘅角色，並視金球影后做目標！
同場嘅Louise王丹妮話見到法拉都即刻心心眼：「有機會合作隔離行過都ok！」其實Louise都有好消息，憑《梅艷芳》被提名第16屆亞洲電影大獎「最佳新演員」，佢謙爆話有得提名就已經好榮幸，完全唔敢諗攞獎！最後預告嚟近會一家三口去東京血拼，返嚟再參與賀歲片《毒舌大狀》嘅謝票！
