【Viu】 由張繼聰同Angela袁澧林主演嘅電影《窄路微塵》今晚首映，兩個主角憑呢套戲早前被提名台灣金馬獎影帝、影后，雖然輸咗，但Angela話唔緊要，因為係證明咗外界對佢嘅肯定，「雖然以前都係以演員自居，但就冇人咁樣看待自己。」咁有冇信心入圍今屆香港電影金像獎？阿聰話：「好坦白點會有人話唔想提名啫！不過唔會諗，一陣又緊張、食唔到嘢、失眠、尿頻，你知我年紀有返咁上下，要養生，肝火上升就唔係幾好。」
而Kay謝安琪當然都有嚟撐老公啦！不過因為太夜所以冇帶仔女嚟，「上次佢哋睇爸爸開騒都真係好難得，張繼聰喎點都要睇啦！」Kay又爆囡囡除咗心心眼Anson Lo同爸爸之外，勁鍾意BLACKPINK，佢哋仲撲到4張飛可以一家四口去睇騷添！喂呀好葡萄呀！
